ශරීරයට අහිතකර සේම නීත්‍යනුකූල නොවන ආකාරයේ රුව පැහැපත් කරන බව සඳහන් ශරීර ආලේපන සහ දියර රුපියල් මිලියන දහයකට අධික තොගයක් පිටකොටුව ප්‍රදේශයේදී වෙළෙඳසල් කිහිපයක කළ හදිසි වැටලීමකදී සොයාගැනීමට හැකි වූ බව පාරිභෝගික සේවා අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක මහතා පවසනවා.
මෙම හදිසි වැටලීම සඳහා පාරිභෝගික සේවා අධිකාරිය සමග පොලිස් විශේෂ කාර්ය බළකාය, පිටකොටුව පොලිසියේ නිලධාරීන්ද සහභාගි වී තිබෙනවා.
රුව පැහැ ගන්වන බව සඳහන් කරමින් නීති විරෝධී ලෙස අලෙවි කිරීමට සූදානම් කර තිබූ මෙම ආලේපන සහ දියර ඇතුළත් නිෂ්පාදන ඇසුරුම්වල නිෂ්පාදිත රටවල් සහ අනෙකුත් තොරතුරු සඳහන් නොමැති බවද හෙළිව ඇති බවයි පාරිභෝගික සේවා අධිකාරිය පවසන්නේ.
මෙම නිෂ්පාදන තොගය පාරිභෝගික නිලධාරීන් සිය භාරයට ගෙන ඇති අතර අලෙවිකරුවන් ඇප බැඳුම්කර මත නිදහස් කර ඉදිරියේදී නඩු පැවරීමට නියමිතයි.
මෙම වෙළෙන්දන්ගෙන් සමහරු දශක දෙකක් හා තවත් සමහරු වසර හතකට අධික කාලයක් තිස්සේ නුසුදුසු ආලේපන විකිණීමේ කටයුත්ත සිදුකර ගෙන ගොස් ඇති බවද අනාවරණ වී තිබෙනවා.
Discussion about this post