ජනප්‍රිය ඉන්දීය ගායන ශිල්පී එස්.පී. බාලසුබ්‍රමනියම් සමුගනී

ඉන්දීය සිනමාවේ ජනප්‍රියතම පසුබිම් ගායන ශිල්පියෙකු මෙන්ස රංගන ශිල්පියෙකුද වූ එස්.පී. බාලසුබ්‍රමනියම් ජීවිතක්ෂයට පත්ව තිබෙනවා. SPB යන නාමයෙන් රසිකයන් අතර ජනාදරයට පත්ව සිටි බාලසුබ්‍රමනියම් මියයන විට 74 වන වියේ පසු විය.

ඔහු පසුගිය අගෝස්තු පළමු සතියේදී කොරෝනා වෛරසය ආසාදනය වී ඇති නමුත් එය එතරම් බරපතල තත්ත්වයක් නොවන බවයි ඉන්දීය වාර්තා පවසන්නේ.

කෙසේ වෙතත් SPBගේ පවුලේ හිතවතුන් ඔහු සම්බන්ධයෙන් වඩාත් සැලකිලිමත් වූ හේතුවෙන් හෙතෙම රෝහල්ගත කර තිබෙනවා.

චෙන්නායිහි එම්.ජී.එම්. හෙල්ත්කෙයාර් හි ප්‍රතිකාර ලබමින් සිටි SPB අගෝස්තු මස 13 වන දින සිදු කරන ලද පරීක්ෂණවලදී අනාවරණ වී ඇත්තේ කොරෝනා ආසාදනය වී නොමැති බවයි.

කෙසේ වෙතත් රෝහල් ප්‍රකාශකයෙක් කියා සිටියේ සැප්තැම්බර් මස මුලදී කොරෝනා වෛරස තත්ත්වය සෘණාත්මක තත්ත්වයක් පෙන්නුම් කළද පසුගිය දින දෙක තුන තුළදී දැඩි අසාධ්‍ය තත්ත්වයට පත්ව සිටි බවයි.

ඒ අනුව ඔහු අසාධ්‍ය රෝගියෙකු සේ සලකා ප්‍රතිකාර කිරීම ආරම්භ කර ඇති නමුත් අද(25) පස්වරු 1.04ට පමණ ජීවිතක්ෂයට පත්වූ බවයි රෝහල් ප්‍රකාශකයා වැඩිදුරටත් පවසන්නේ.

එහිදී වැඩිදුරටත් අදාළ රෝහල් ප්‍රකාශකයා පවසන්නේ ඔහුගේ පවුලේ අයට, මිතුරන්ට, සුබපැතුම් එක් කරන්නන්ට නිරෝගි සුවය පතන්නන්ට තම රෝහලේ ශෝකය ප්‍රකාශ කර සිටින බවයි.

එස්.පී. බාලසුබ්‍රමනියම්ගේ පුත් එස්.පී. චරන් පවසා ඇත්තේ SPB හැම කෙනාට අයිති අයෙක් බවත් ඔහු සැමදා ඔහුගේ ගීතත් සමගින් ජීවත් වනු ඇති බවත් මාගේ පියා පස්වරු 1.04ට පමණ ජීවිතක්ෂයට පත්වූ බවත්ය.

ශ්‍රීපති පණ්ඩිතාරධුල බාලසුබ්‍රමනියම්(SPB) ඉන්දියානු සංගීතයට කළ අසමසම දායකත්වය වෙනුවෙන් විවිධ වයස් කාණ්ඩුවල රසිකයන්ගේ ගෞරවාදාරයට පාත්‍ර විය.

ඔහු විසින් ගීත 40,000කට අධික සංඛ්‍යාවක් ගායනා කර ගිනස් ලෝක වාර්තාවක් තබා ඇති බවයි ඉන්දිය මාධ්‍ය වාර්තා කරන්නේ.

දෙමළ, තෙළිඟු, කන්නඩ, මලයාලම් සහ හින්දි ඇතුළු භාෂා 16ක චිත්‍රපටවල ගීත ගායනට එක්ව ඇති එස්.පී. බාලසුබ්‍රමනියම් බොහෝ චිත්‍රපටවල වැදගත් චරිත නිරූපණයටද එක්ව තිබෙනවා.

ඔහු චරිත නිරූපණය කළ ප්‍රධාන චිත්‍රපට අතර කෙලඩි කන්මනි(1990), තිරුදා තිරුඩා(1994), කඩලන්(1994) සහ තවත් චිත්‍රපට රැසක් වන බවයි වාර්තා වන්නේ.

දශක පහක වෘත්තීය ගායන ජීවිතය තුළදී SPB හොඳම පිරිමි පසුබිම් ගායකයා සඳහා ජාතික චිත්‍රපට සම්මාන හයක් සහ නන්දි සම්මාන 25ක් දිනා ගැනීමට සමත්වූවා.

එසේම 2001 වර්ෂයේදී පද්ම ශ්‍රී සම්මානයත් 2011 වර්ෂයේදී පද්ම භූෂාන් සම්මානයෙන්ද පිදුම් ලැබුවා.