ශ්‍රී ලංකා දකුණු අප්‍රිකා පළමු ටෙස්ට් තරගය අද

සංචාරක ශ්‍රී ලංකා කණ්ඩායම සහ දකුණු අප්‍රිකාව සමග පැවැත්වෙන තරග දෙකකින් සමන්විත ටෙස්ට් ක්‍රිකට් තරගාවලියේ පළමු තරගය අද (26 වැනිදා) හෙවත් බොක්සිං දිනයේදී ආරම්භ වේ. සෙන්චූරියන්හිදී ආරම්භ වන අදාළ තරගය ශ්‍රී ලංකා වේලාවෙන් ප.ව. 1.30ට ආරම්භ වීමට නියමිතයි.

මෙය ශ්‍රී ලංකා කණ්ඩායම මාස 11කට පසුව සහභාගි වන පළමු ටෙස්ට් තරගාවලිය වීම විශේෂත්වයක් වන අතර අවසන් වරට ඉකුත් ජනවාරි මාසයේ සිම්බාබ්වේ සත්කාරකත්වය දැරූ ටෙස්ට් තරගාවලියකට සහභාගි වෙමින් තරගාවලිය 1-0කින් ජය ගැනීමට ශ්‍රී ලංකාවට හැකි විය.

ඉන් අනතුරුව ඉකුත් මාර්තු මාසයේ ටෙස්ට් තරගාවලියක් සඳහා එංගලන්තය ශ්‍රී ලංකාවට පැමිණියද, උද්ගත වසංගත රෝග තත්ත්වය හමුවේ අදාළ තරගය පැවැත්වීමට නොහැකිව එම කණ්ඩායමට ආපසු හැරී යෑමට සිදුවුණි.

ශ්‍රී ලංකාව සහ දකුණු අප්‍රිකාව අතර මේ දක්වා පැවැති ටෙස්ට් තරග 29ක් අතුරින් තරග 14ක ජය දකුණු අප්‍රිකාවටත්, තරග 9ක ජය ශ්‍රී ලංකාවටත් හිමිව තිබේ.

අවසන් වරට මෙම කණ්ඩායම් අතර ටෙස්ට් තරගාවලියක් පවත්වා ඇත්තේ 2019 පෙබරවාරි මාසයේදීය. දකුණු අප්‍රිකාවේ සත්කාරකත්වයෙන් පැවැති එම තරගාවලියෙන් 2-0ක් ලෙස ඉතිහාසගත ජයක් වාර්තා කිරීමට ශ්‍රී ලංකාවට හැකි විය. එම තරගාවලියේ පළමු තරගයේ අවසන් කඩුල්ල සඳහා කුසල් පෙරේරා සහ විශ්ව ප්‍රනාන්දු ලකුණු 78ක වාර්තාගත සබඳතාවයක් පිහිටුවීම විශේෂත්වයක් විය.

එල්.පී.එල්. තරගාවලියට පෙර දකුණු අප්‍රිකා ටෙස්ට් සංචාරය අරමුණු කර ගනිමින් 22 දෙදෙනකුගෙන් යුත් ශ්‍රී ලංකා ටෙස්ට් සංචිතය පල්ලෙකැලේ ක්‍රීඩාංගණයේදී නේවාසික පුහුණුවක නිතර විය. එම සංචිතයට ඇතුළත්ව සිටි ඇන්ජලෝ මැතිව්ස් එල්.පී.එල්. තරගාවලිය අතරතුර ආබාධයකට ලක් වීම හේතුවෙන් මෙම සංචාරය අහිමි වූ අතර එල්.පී.එල්. තරගාවලියේදී වළලුකර ආබාධයකට ලක් වූ ආරම්භක පිතිකරු ඕෂධ ප්‍රනාන්දුටද හෙට තරගය අහිමිවනු ඇතැයි පැවසේ.